Cibiyar Yaƙi da Laifukan Yanar Gizo ta Rundunar ’Yan Sandan Nijeriya (NCCC) ta ce tana gudanar da bincike kan wani lamari da ya shafi damfara ta hanyar amfani da kwamfuta, satar bayanan sirri da kuma halasta kuɗaɗen da aka samu ta haramtacciyar hanya, wanda ya haɗa da wani mutum, matar sa da kuma agolar sa.
Ta ce binciken ya biyo bayan wani rahoton sirri da ta samu daga Hukumar Leƙen Asirin Kuɗi ta Nijeriya (NFIU).
Muƙaddashin Jami’in Hulɗa da Jama’a na NPF-NCCC da ke Abuja, DSP Unwana Imah, ya bayyana a cikin wata sanarwa cewa binciken farko ya nuna cewa ana zargin wani Emmanuel Amanfo, mazaunin Jihar Legas wanda a halin yanzu ya gudu, da haɗa baki da agolar sa mai shekaru 22, Rokibat Oluwasheyi Imoru, wajen buɗe da kuma sarrafa asusun banki da dama domin gudanar da ayyukan damfara. Ɗaya daga cikin waɗanda suka yi wa damfarar ita ce wata mazauniyar ƙasar Malta (an ɓoye sunan ta).
Ƙarin bincike ya nuna cewa ana tura kuɗaɗe ta hannun kamfanonin tura kuɗi da kuma ta hanyar ajiya kai-tsaye zuwa wasu asusun banki daban-daban a Nijeriya, waɗanda duk mallakin Rokibat Imoru ne.
Bayan karɓar kuɗaɗen, sai a mayar da su zuwa wani asusun Ecobank mallakin mahaifiyar ta mai shekaru 39, Diana Urowhe, inda ake zargin an kashe kuɗaɗen da aka samu.
Imah ya ce bayan gudanar da binciken fasaha kan yawon waɗanda ake zargin a intanet, sai aka kama matar da ’yar ta saboda rawar da suka taka a wata damfarar soyayya ta intanet.
Ya ce: “Ana ci gaba da ƙoƙarin cafke Emmanuel Amanfo, wanda ya tsere. Shi ne mijin Urowhe Diana kuma uban ga Rokibat Oluwasheyi Imoru wadda bai haifa ba.”
Ya ƙara da cewa: “Har yanzu bincike na ci gaba da gudana kan lamarin, kuma za a gurfanar da waɗanda ake zargi a gaban kotu bayan kammala binciken.”
Mai magana da yawun ‘yan sandan ya ce: “Rundunar ’Yan Sandan Nijeriya ƙarƙashin jagorancin Sufeto Janar na ’Yan Sanda, IGP Olatunji Rilwan Disu, psc(+), NPM, tana ci gaba da jajircewa wajen kare kayayyakin fasahar dijital na Nijeriya da kuma tabbatar da tsaron sararin yanar gizon ƙasar.
“A ci gaba da wannan ƙoƙari, Daraktan NPF-NCCC yana kira ga jama’a da su riƙa kai rahoton duk wasu ayyukan da ake zargin laifukan yanar gizo ne ta hanyar shafin mu na hukuma na kai rahoto ko kuma ta adireshin imel ɗin mu: nationalcybercrimecenter@nccc.gov.ng.”
