Gwamnan Babban Bankin Nijeriya (CBN), Olayemi Cardoso, ya kare matakin da bankin ya ɗauka na komawa tsarin gudanar da manufofin kuɗi na ƙeƙe-da-ƙeƙe, tare da gargaɗin cewa sake komawa tsohon tsarin shiga tsakani ta hanyar bada lamunin tallafi ga ƙanana da matsakaitan masana’antu, a baya ya janyo matsaloli ga ma’aunin kuɗaɗen CBN, tare da rage ingancin manufofin kuɗi.
Cardoso ya bayyana hakan ne yayin zaman buɗe taron bitar Kwamitin Manufofin Kuɗi (MPC) da aka gudanar ranar 21 ga Mayu, 2026, kamar yadda wata sanarwa da CBN ya fitar ranar Lahadi ta bayyana.
Sanarwar ta ce Cardoso ya sake jaddada ƙudurin bankin na bin tsarin manufofin kuɗi na gargajiya, gaskiya da kuma yanke shawara bisa hujjoji da bayanai, yana mai bayyana cewa sauye-sauyen da ake aiwatarwa suna da muhimmanci wajen dawo da ƙwarin gwiwa ga tattalin arzikin Nijeriya da kuma ƙarfafa daidaiton tattalin arziki.
Daga cikin tallafin lamunin gaggawa da CBN ya riƙa bayarwa kafin wannan gwamnati, akwai har da shirin bada lamuni ga manoma da aka fi sani da ‘anchor borrowers’, wanda biyan kuɗin ya zama alaƙaƙai daga baya.
Taron bitar mai taken, “Ƙarfafa Ingancin Manufofin Kuɗi Domin Samun Ɗorewar Daidaiton Tattalin Arziki”, ya haɗa mambobin Kwamitin Manufofin Kuɗi (MPC), Mataimakan Gwamnan CBN, daraktoci da sauran masu ruwa da tsaki domin tattauna hanyoyin inganta tasirin manufofin kuɗi a cikin yanayin tattalin arzikin gida da na duniya da ke ci gaba da sauyawa.
Cardoso ya waiwayi tarihin manufofin kuɗi na baya-bayan nan a Nijeriya tare da bayyana ƙalubalen da bankin ya tarar lokacin da gwamnati ta yanzu ta hau mulki. Ya ce daga cikin matsalolin akwai raunin ‘yancin cin gashin kai ga CBN, raguwar amincewa da manufofin sa da kuma dogaro da hanyoyin da ba na gargajiya ba wajen tafiyar da manufofin kuɗi.
“Ya bayyana cewa waɗannan ƙalubalen sun rikita bambanci tsakanin ayyukan gwamnati da na manufofin kuɗi, sun rage gaskiya da bayyana bayanai, tare da taƙaitai tasirin manufofin da ake aiwatarwa. Haka kuma ya lura cewa kasuwar canjin kuɗaɗen ƙasashen waje ba ta ta aiki yadda ya kamata, yayin da rashin daidaituwar haɗin gwiwa tsakanin manufofin gwamnati da na kuɗi ya ƙara taƙaita sakamakon tattalin arziki.”
CBN ya ce waɗannan matsalolin tsarin sun taimaka wajen hauhawar farashi, rikice-rikicen farashin canjin kuɗi da kuma raguwar amincewar masu zuba jari da jama’a.
Sai dai sanarwar ta ce sauye-sauyen da shugabancin yanzu ya kawo sun fara sauya wannan yanayi.
Ya bayyana cewa bankin ya dawo da tsarin gudanar da manufofin kuɗi na gargajiya a ƙarƙashin tsarin MPC na yanzu, inda aka sake mayar da hankali kan amfani da tsarin gamegari da kuma amfani da ƙimar kuɗin ruwa na MPR a matsayin babbar hanyar isar da saƙon manufofi.
Sanarwar ta ƙara da cewa inganta tsarin sarrafa kuɗaɗen shiga da fita, bayar da hasashen manufofi da kuma sadarwa kan manufofin sun ƙara gaskiya tare da taimakawa wajen daidaita hasashen jama’a, ‘yan kasuwa da masu zuba jari.
“A sakamakon haka, sai Cardoso ya ce duk da cewa har yanzu ba a kakkaɓe hauhawar farashi baki ɗaya ba, amma dai ya fara raguwa, yayin da daidaiton farashin canjin kuɗi ya inganta.
