Mai Shari’a Joyce Abdulmalik ta Babbar Kotun Tarayya da ke Abuja ta bai wa tsohon gwamnan Jihar Kaduna, Malam Nasir El-Rufai, beli bisa tsauraran sharuɗɗa da suka haɗa da kuɗi har Naira miliyan 100 tare da mutum guda da zai tsaya masa da irin wannan adadi.
Yayin da take yanke hukuncin, Mai Shari’a Abdulmalik ta gindaya wasu tsauraran sharuɗɗa da wanda ake ƙara dole ya cika kafin a kammala batun belin.
Kotun ta ce dole ne mutumin da zai tsaya masa ya kasance mazaunin yankin Maitama ko Asokoro a Abuja, sannan ya ajiye ainihin takardar mallakar fili ko gida (Certificate of Occupancy) a ma’ajiyar kotu.
Haka kuma, dole ne wanda zai tsaya masa ya kasance ma’aikacin Gwamnatin Tarayya wanda matsayin sa bai gaza mataki na 17 (Grade Level 17) ba, sannan ya gabatar da shaidar biyan albashi na aƙalla watanni uku, tare da wasiƙa daga manajan banki da ke ƙarƙashin ikon kotun da ke tabbatar da hakan.
Kotun ta kuma umurci wanda zai tsaya masa da ya rantse a gaban kotu kan ƙarfin sa na kuɗi, ya rattaba hannu kan takardar belin, sannan ya gabatar da sabon hoton fasfo zuwa ma’ajiyar kotu.
A matsayin wani ɓangare na sharuɗɗan belin, an umurci El-Rufai da ya miƙa duk wasu ingantattun fasfo ɗin sa na ƙasa da kasa zuwa ma’ajiyar kotu.
Kotun ta kuma buƙaci a gabatar da wasiƙar tantancewa daga sashen aikin wanda zai tsaya masa, tare da takardar shaidar biyan haraji na watanni shida da suka gabata.
Mai Shari’a Abdulmalik ta kuma umurci wanda ake ƙara da ya riƙa zuwa hedikwatar Hukumar Tsaron Farin Kaya (DSS) a kowace Juma’ar ƙarshe ta wata da ƙarfe 10 na safe domin sanya hannu a rajistar halarta har sai an yanke hukunci a shari’ar.
Alƙalin ta gargaɗi cewa rashin cika waɗannan sharuɗɗa zai sa a soke belin kai-tsaye.
Bugu da ƙari, kotun ta umurci wanda ake ƙara da ya gabatar da wasiƙar shaidar gaskiya daga Shugaban Majalisar Sarakunan Gargajiya ta Kaduna.
