Gwamnatin Tarayya, ta hannun Kwamitin Shugaban Ƙasa kan Amfani da Iskar Gas (CNG) da Motocin Lantarki (Pi-CNG & EV), ta ƙaddamar da shirin na shiyyar Arewa a Jihar Kano.
Wannan mataki yana daga ƙoƙarin Gwamnatin Tarayya na samar da sauƙin sufuri ga al’umma da kuma farfaɗo da tattalin arziki.
Mataimakin Shugaban Kasa, Sanata Kashim Shettima, ya bayyana a taron cewa sauya ababen hawa zuwa masu amfani da iskar gas da motocin lantarki zai taimaka ƙwarai wajen rage kuɗin sufuri, samar da isasshen makamashi, da kuma tabbatar da cigaban tattalin arziki mai ɗorewa.
“Kuɗin sufuri yana shafar komai, farashin abinci, masana’antu, zirga-zirgar kayayyaki, da kuma rayuwar talakan Nijeriya.
“Wannan shiri ba kawai manufar makamashi ba ce; tsari ne na tattalin arziki don bunƙasar ƙasa,” inji shi.
Shettima, wanda Mataimakin Babban Jami’in Ma’aikatan sa (Deputy Chief of Staff), Ibrahim Hassan Haɗeja, ya wakilta a wurin taron, ya ƙara da cewa an zaɓi Kano don ƙaddamar da shirin a Arewa ne saboda matsayin ta na dabarun kasuwanci, kasancewar ta babbar ƙofa ta kasuwanci tsakanin amfanin shiyyar Arewa da maƙwabtan ƙasashe.
Haka kuma ya yaba wa kamfanoni masu zaman kan su kamar Greenville LNG da NIPCO Gas da suka zuba biliyoyin naira a fannin gas, sannan ya bayyana zuba jarin Aliko Ɗangote na sayen dubun-dubatar motocin dakon kaya masu amfani da CNG a matsayin abin a yaba.
A nasa jawabin, Gwamnan Jihar Kano, Alhaji Abba Kabir Yusuf, ya bayyana ƙaddamar da shirin a matsayin babban alheri da zai rage kuɗin sufuri kai-tsaye tare da buɗe ƙofofin haɓaka tattalin arziki a jihar.
Yusuf ya jaddada cewa tuni gwamnatin jihar ta haɗa gwiwa da masu zuba jari don faɗaɗa ayyukan samar da ababen hawa na lantarki da na gas, inda aka ba da filaye ga kamfanonin da ke son kafa rassa a Kano.
Ya kuma bayyana cewa shirin zai samar da ayyukan yi ga matasa ta hanyar horar da su fasahar sauya injina zuwa na CNG, gyare-gyare, da harkokin sufuri.
A nasa ɓangaren, Shugaban Kwamitin Gudanarwa na Shirin, Barr. Ismaeel Ahmed, ya bayyana cewa Shugaba Bola Ahmed Tinubu ya ba shi umurni na musamman don ya sauya fasalin makamashin gas a arewacin Nijeriya tare da mayar da Kano babbar cibiyar shirin.
Ya ce: “Shugaban Ƙasa ya shaida mini cewa ba ya son a tuna da shi kawai a matsayin shugaban da ya cire tallafin man fetur, a’a, yana son a tuna da shi a matsayin Shugaban Ƙasa da ya samar da madadin mafita mai ɗorewa ga ‘yan Nijeriya.”
Ahmed ya bayyana cewa a cikin watanni takwas kacal, shirin ya kafa tashoshin CNG guda biyar da na LNG guda biyu a Kano, sannan an riga an fito da motoci 40 da babura masu ƙafa uku (daidaita sahu) guda 200.
Ya ƙara da cewa ana shirin tura ƙarin motoci 5,000 da manyan motoci guda 200 zuwa Kano nan ba da daɗewa ba.
A gefen taron, Ahmed ya sanya hannu kan yarjejeniyar fahimta (MoU) da Bankin Lotus domin samar da tallafin kuɗi na biliyoyin naira don ‘yan kasuwa, masu zuba jari, da masu ababen hawa da ke cikin tsarin CNG.
