Babban Bankin Nijeriya (CBN) yana yunƙurin sake ƙarfafa jari da kuma sake fasalin cibiyoyin bayar da kuɗin bunƙasa tattalin arziki domin magance babban gibin kuɗaɗe da ke fuskantar matsakaita da ƙananan kamfanoni (MSMEs).
Yiwuwar wannan gagarumin aikin ya fito ne daga bakin Mataimakin Gwamnan CBN mai kula da manufofin tattalin arziki, Muhammad Abdullahi, inda ya bayyana hakan a wani zaman tattaunawa yayin ƙaddamar da rahoton Bankin Duniya kan Nijeriya.
Tun a makon jiya ne dai aka gudanar da taron a Abuja, inda ya ce wani bincike da CBN ya gudanar kwanan nan ya nuna cewa cibiyoyin DFIs da ake da su ba su da sukunin biyan bukatun bayar da rance ga kamfanoni.
“Mun gudanar da wata bita a bara a fannin bayar da kuɗin bunƙasa hadahada. Idan aka tattara dukkan DFIs a Nijeriya, jimillar kadarorin su ta dan fi Naira tiriliyan 8 kadan, alhali abin da ake buƙata don MSMEs, ana so ya haura Naira tiriliyan 130,” inji shi.
Abdullahi ya bayyana cewa wannan babban gibi tsakanin abin da ake da shi da abin da ake buƙata na nuna bukatar gaggawar yin gyare-gyare a fannin, ba wai ƙara jari kaɗai ba.
“Hanya ɗaya tilo ta magance wannan ba wai saka jari daga gwamnati kaɗai ba ne, har ma da sanya waɗannan cibiyoyi su zama masu jan hankalin masu zuba jari da kuma masu iya samun riba,” inji shi.
Ya ƙara da cewa CBN tare da Ma’aikatar Kuɗi sun riga sun fara duba tsarin DFIs domin inganta aikin su, ciki har da tsarin ƙarfafa gwiwa da kuma yadda suke amfani da jari yadda ya kamata.
“Muna duba dukkan tsarin domin mu gyara ƙarfafawa, mu inganta sha’awar ɗaukar kalubale sannan mu ƙara ƙarfin jarin su,” inji shi.
Ya ce gyaran zai shigar da ƙa’idojin kasuwa sosai cikin ayyukan DFIs.
“Muna nazarin tsarin domin ganin yadda za a ƙara amfani da ƙa’idojin kasuwa, domin yadda ake yi a baya bai kawo sakamakon da ake so ba,” ya ce.
Abdullahi ya jaddada cewa samun damar kuɗi ga matsakaita da ƙananan kamfanoni har yanzu babban ƙalubale ne a tsarin tattalin arzikin Nijeriya, musamman ga MSMEs.
“Ba da rance ya daɗe yana daga cikin manyan ƙalubale wajen tabbatar da cewa kuɗi ya kai ga kamfanonin da suke buƙata,” inji shi.
Ya kuma nuna cewa ƙoƙarin sake ƙarfafa jarin bankuna da aka yi kwanan nan zai taimaka wajen ƙara ƙarfin su na bayar da rance.
