Ministan Babban Birnin Tarayya (FCT), Mista Nyesom Wike, ya yi watsi da zargin cewa wai an hana jam’iyyar African Democratic Congress (ADC) amfani da filin Dandalin Eagle domin gudanar da babban taron ta na ƙasa.
Wike, wanda ya bayyana hakan a yau Litinin bayan ya duba ayyukan da ake yi a Abuja, ya bayyana zargin a matsayin “maras tushe”, yana mai cewa babu wata takardar neman izini da aka gabatar a hukumance don amfani da wurin.
Jam’iyyar ADC ta nuna damuwa kan matsalolin samun wurin da za ta gudanar da babban taron ta na ƙasa, wanda aka shirya yi a gobe Talata a Abuja.
Shugaban Kwamitin Yaɗa Labarai da Hulɗa da Jama’a na taron jam’iyyar, Kola Ologbondiyan, shi ne ya bayyana hakan a yau Litinin.
Ologbondiyan ya ce har zuwa ƙasa da sa’o’i 24 kafin taron, jam’iyyar ba ta samu amincewa da wani wuri ba.
Ministan ya ce: “Wa ya hana su? Ban san da wani irin abu haka ba.
“Idan African Democratic Congress ce, to irin wannan zargi nasu ne na yau da kullum don neman tausayi daga jama’a.”
Ya bayyana cewa amfani da Dandalin Eagle yana buƙatar bin ƙa’ida, wanda ya haɗa da gabatar da takardar nema ta hanyar kamfanin Abuja Investments Company Ltd, wanda ke kula da wurin, tare da biyan kuɗaɗen da suka dace.
Ministan ya kuma nuna cewa Velodrome na Dandalin Wasanni na Moshood Abiola na Ƙasa ba ya ƙarƙashin ikon Hukumar FCT, sai dai na Hukumar Kula da Wasanni ta Ƙasa.
Ya ce:“Yanzu haka, babu wata takardar nema da aka gabatar ga Abuja Investments Company Ltd.
“Lokacin da jam’iyyar APC ta yi amfani da wurin, haka kuma PDP ta yi amfani da Velodrome na filin wasan, sun bi dukkan matakan da aka tanada.
“Ba mu hana kowa amfani da wurin idan an bi ƙa’idoji,” inji shi.
Da yake magana kan ayyukan da ya duba, ministan ya nuna gamsuwa da yadda aikin ke tafiya, yana mai tabbatar da cewa manyan ayyukan tituna za su kammala kafin ranar 15 ga Mayu.
“’Yan kwangila sun tabbatar mana cewa za a kammala ayyukan tituna kafin 15 ga Mayu, yayin da aiki n shigar da fitilun titi za a kammala shi kafin ƙarshen watan Mayu,” inji shi.
A unguwar Gaduwa, Wike ya ce ya umurci a saka shinge na kariya domin hana mamaye hanyoyin tituna, yayin da aikin fitilun titi yake ci gaba.
A unguwar Wassa kuma, ministan ya bayyana cewa gwamnatin FCT tana shirin tada masu sana’a da ‘yan kasuwar kayan gyaran mota da ke aiki a Apo Mechanic a kan hanyar Outer Southern Expressway.
Ya ce za a mayar da su wani sabon wuri da aka tanada da kayan more rayuwa da suka dace.
“Manufar wannan shirin shi ne inganta yanayin aikin masu sana’a tare da cika alƙawurran da aka daɗe ana yi wa ɓangaren tattalin arzikin da ba na gwamnati ba,” inji shi.
Wike ya danganta cigaban ayyukan FCT da haɗin kai mai kyau tsakanin gwamnati da ‘yan kwangila, tare da biyan kuɗaɗen kwangila a kan lokaci.
