Rundunar sojin Nijeriya ta ce a yau Lahadi ta ceto mutane fararen hula 31 waɗanda aka yi garkuwa da su yayin wani hari da aka kai wa wani coci a Jihar Kaduna, sannan sun gano gawar mutum biyar a wurin harin.
Sojojin sun ce harin ya faru ne yayin gudanar da ibadar Ista a wani coci da ke ƙauyen ƙauyen Ariko, cikin Ƙaramar Hukumar Kachiya. Sun ƙara da cewa dakarun suna ci gaba da bin sawun maharan.
Shugaban Ƙungiyar Kiristoci ta Nijeriya (CAN) na jihar, Caleb Maaji, ya ce an kai hari kan coci biyu a ƙauyen Ariko a ranar Lahadi. Ya ce mutum bakwai sun mutu yayin da aka yi garkuwa da wasu da ba a san adadin su ba.
“Har yanzu ana ci gaba da bincike,” inji Maaji a hirar sa da kamfanin dillancin labarai na Reuters.
Yankin Arewa-maso-yammacin Nijeriya ya shafe shekaru yana fama da rikice-rikice, ciki har da satar mutane domin neman kuɗin fansa da kuma hare-haren ƙauyuka, inda ƙungiyoyin masu ɗauke da makamai suke aiki daga manyan dazuzzuka da ke yankin.
