Nijeriya ta yi karin haske kan yarjejeniyar haɗin gwiwa kan harkar hijira tsakanin ta da Birtaniya,.
Wannan ya biyo yawaitar bayanan ƙarya da ake yaɗawa a wasu kafofin soshiyal midiya.
A cikin sanarwar da mai ba Shugaban Ƙasa Shawara kan Harkokin Yaɗa Labarai da Dabaru, Bayo Onanuga, ya fitar, gwamnatin ta ce yarjejeniyar da aka ƙulla a lokacin ziyarar aiki ta Shugaba Bola Ahmed Tinubu a Birtaniya tana da nufin ƙarfafa dangantaka da kuma tsara hanyoyin zirga-zirgar jama’a cikin tsari mai kyau.
~ Ba a tilasta wa Nijeriya karɓar baƙin haure ba
Sanarwar ta jaddada cewa babu wani sashe a cikin yarjejeniyar da ya tilasta wa Nijeriya ta karɓi baƙin haure waɗanda ba ‘yan ƙasar nan ba. Ta ce duk wanda za a dawo da shi dole ne ya kasance ɗan Nijeriya ne wanda aka tabbatar da asalin sa ta hanyoyi da dama na tantancewa.
Haka kuma, idan aka samu kuskure wajen kawo mutum, ƙasar da ta turo shi ce za ta sake karɓar sa tare da ɗaukar nauyin dukkanin kuɗin da abin ya shafa.
~ Mayar da ‘yan ƙasa cikin mutunci
Yarjejeniyar ta tanadi cewa duk wani ɗan ƙasar nan da za a dawo da shi daga wata ƙasa dole ne a yi hakan cikin mutunci, tare da kiyaye haƙƙoƙin sa na ɗan’adam.
Hukumomin tsaro na ƙasashen biyu za su yi aiki tare domin kare lafiyar ‘yan ƙasa da kuma rage matsalolin da ka iya tasowa daga batun hijira.
~ Tsare-tsaren dawo da ‘yan ƙasa
An bayyana cewa za a iya dawo da mutum ta jirgin sama na yau da kullum ko na musamman, tare da bayar da cikakken bayani kafin kwanaki biyar da aiwatar da hakan.
Haka kuma, dole ne a tabbatar da sahihancin takardun tafiya, ko ta hanyar fasahar tantance bayanai (biometric), kafin a kammala shirin mayar da mutum.
~ Nijeriya ce ke da ikon bayar da takardu
Sanarwar ta fayyace cewa Hukumar Shige da Fice ta Nijeriya ce kaɗai ke da ikon bayar da takardun da suka dace ga ‘yan ƙasar da za a dawo da su, ba tare da wani tsoma baki daga ƙasashen waje ba.
~ Tallafin sake tsugunar da masu dawowa
A cewar sanarwar, yarjejeniyar ta tanadi tallafi ga masu dawowa, ciki har da:
- Taimakon gaggawa kamar masauki da sufuri
- Haɗa su da iyalan su
- Tallafin sana’o’i da ilimi
- Samar da damar kafa kasuwanci
Haka kuma, za a samar da asusun tallafi domin taimaka wa masu dawowa su samu dogaro da kai a rayuwar su.
Gwamnatin Tarayya ta bayyana cewa irin wannan yarjejeniya ba sabuwa ba ce, domin an taɓa ƙulla makamanciyar ta a shekarun baya, kuma wannan sabuwar yarjejeniyar za ta ɗauki tsawon shekaru biyar kafin a sabunta ta.
A ƙarshe, gwamnati ta buƙaci kafafen yaɗa labarai da su riƙa neman sahihin bayani kafin wallafa labarai, domin kauce wa yaɗa bayanan da ba su dace ba.
