Shugaban Bola Tinubu zai bar Abuja gobe Talata domin kai Ziyarar Ƙasa (State Visit) zuwa Birtaniya, bisa gayyatar Mai Martaba Sarki Charles na III da Sarauniya Camilla.
Shugaban ƙasar zai tafi tare da Uwargidan Shugaban Ƙasa, Sanata Oluremi Tinubu, domin halartar muhimman ayyukan hukuma da aka tsara yayin ziyarar.
Sarki Charles na III zai karɓi baƙuncin Tinubu da Uwargidan sa a fadar Windsor Castle daga ranar Laraba zuwa Alhamis a matsayin wani ɓangare na shirye-shiryen ziyarar ƙasar.
Hakan yana ƙunshe ne a cikin wata sanarwa da mai magana da yawun Shugaban Ƙasa, Mista Bayo Onanuga, ya fitar yau Litinin a Abuja.
Wannan Ziyarar Ƙasa ita ce ta farko da wani shugaban Nijeriya zai kai Birtaniya cikin shekaru 37, inda sarkin na Birtaniya zai karɓi baƙuncin sa a Windsor Castle.
Nijeriya da Birtaniya suna da tsayayyun dangantakar diflomasiyya da tarihi, waɗanda aka gina tsawon shekaru ta hanyar haɗin gwiwar siyasa, tattalin arziki da al’adu.
Ana sa ran wannan ziyara za ta ƙara ƙarfafa dangantakar ƙasashen biyu tare da buɗe sababbin hanyoyin haɗin gwiwa a tsakanin su.
Fannonin haɗin gwiwar da za a tattauna a kan su sun haɗa da shige-da-fice, kasuwanci, zuba jari da musayar al’adu.
Yayin da suke fadar Windsor Castle, Mai Martaba Sarkin da Sarauniyar za su gayyaci Shugaban Ƙasa da Uwargida Remi su duba baje-kolin kayayyakin fada na musamman daga Royal Collection waɗanda suka shafi Nijeriya.
Sarki da Shugaba Tinubu za su kuma gudanar da tattaunawar sirri, sannan su gana da ƙungiyoyi da ke aiki kan tattaunawar addinai daban-daban (interfaith dialogue) a matakin ƙasa da na duniya.
Daga baya, Iyalan Sarauta za su shirya liyafar cin abinci ta ƙasa (State Banquet) domin girmama baƙin daga Nijeriya.
Haka kuma, Tinubu zai yi ganawar biyu-da-biyu da Firayim Ministan Birtaniya, Keir Starmer, gidan sa da ke lamba 10 Downing Street.
Ana sa ran ganawar za ta ƙara ƙarfafa hulɗar diflomasiyya tsakanin manyan jami’an ƙasashen biyu.
Za a kuma kammala taron da sanya hannu kan yarjejeniyoyi da dama (Memoranda of Understanding) da suka shafi kasuwanci, zuba jari, tsaro da haɗin gwiwar al’adu.
Shugaban Ƙasar zai kuma shaida sanya hannu kan yarjejeniyar kuɗi ta fam miliyan 746 tsakanin UK Export Finance da hukumomin Nijeriya.
Yarjejeniyar za ta taimaka wajen gyara tashar jiragen ruwa ta Legas (Apapa Quays) da ta Tin Can Island.
Tinubu zai kuma halarci baje-kolin Nigerian Modernism da ke nuna fasaha da al’adun Nijeriya na zamani, sannan ya shiga wani taron liyafa tare da shugabannin kasuwanci na Nijeriya da Birtaniya, da kuma ‘yan Nijeriya mazauna ƙasashen waje (diaspora).
Daga cikin tawagar shugaban ƙasar akwai Shugaban Majalisar Dattawa, Godswill Akpabio; Ministan Shari’a, Lateef Fagbemi; Ministan Ma’adinai, Dele Alake; da Ministan Yaɗa Labarai da Wayar da Kai, Mohammed Idris.
Sauran sun haɗa da Karamin Ministan Harkokin Waje, Bianca Ojukwu; Ministan Kuɗi, Wale Edun; Ministan Masana’antu, Kasuwanci da Zuba Jari, Jumoke Oduwole; da Ministar Al’adu da Tattalin Arzikin Ƙirƙira, Hannatu Musawa.
Haka kuma Ministan Sadarwa da Tattalin Arzikin Dijital, Bosun Tijani; Ministan Tsaro, Janar Christopher Musa (mai ritaya); Mai Ba Shugaban Ƙasa Shawara kan Tsaro na Ƙasa, Nuhu Ribadu, da Darakta-Janar na Hukumar Leƙen Asiri ta Ƙasa (NIA), Ambasada Mohammed Mohammed, suna cikin tawagar.
Ana sa ran Shugaban Ƙasar zai dawo Nijeriya bayan kammala ziyarar ƙasar.
