Shugaban Ƙasa Bola Ahmed Tinubu ya sauka a Abuja a daren yau bayan kammala hutun sa a ƙasar Faransa.
Shugaban ya sauka a Abuja daga Paris, babban birnin ƙasar Faransa, inda ya yi hutun kwana 10.
Ya sauka a filin jirgin sama na Nnamdi Azikiwe a Abuja inda manyan jami’an gwamnati suka tarbe shi.
‘Yan tarbar sa sun haɗa da Shugaban Majalisar Dattawa, Godswill Akpabio; Ministan Ilimi, Wale Edun, da Shugaban ma’aikatan Fadar Shugaban Ƙasa, Femi Gbajabiamila, da Gwamnan Jihar Nasarawa, Alhaji Abdullahi Sule.
Da ma tun jiya Litinin mataimaki na musamman ga Shugaban Ƙasa kan yaɗa labarai, Bayo Onanuga, ya bada sanarwar cewa Tinubu zai dawo gida a yau.
Shugaban ya bar Nijeriya ne a ranar 4 ga Satumba don gudanar da hutun sa na shekara. Ya so raba hutun tsakanin Paris da London, to amma daga Paris sai ya dawo.
A zaman sa a Paris sun gana da Shugaban Faransa, Emmanuel Macron, a Fadar Elysee, kan ƙawancen ƙasashen biyu tare da alƙawarin za ƙarfafa dangantaka ta fuskar tattalin arziki da zaman lafiya.
