Allah ya yi wa Sarkin Zuru, Janar Muhammadu Sani Sami (mai ritaya) rasuwa.
A cikin wata sanarwa, Sakataren Yaɗa Labarai na Gwamnan Kebbi ya ce marigayi Sani Sami ya rasu a London, a wani asibiti bayan wata jinya.
Basaraken, wanda tsohon janar ne na soja, ya rasu bayan gajeruwar jinya.
Ya rasu yana da shekaru 81 kuma ana kiran sa da Muhammad Sani Sami, Gomo na II.
A lokacin da yana soja, ya yi gwamna a Jihar Bauchi, bayan juyin mulkin da aka kifar da gwamnatin farar hula ta Shehu Shagari cikin 1983.
Ya riƙe Jihar Kebbi har zuwa 1985, lokacin da Janar Babangida ya hamɓarar da gwamnatin soja ta Muhammadu Buhari.
Sami ya yi ritaya daga aikin soja cikin 1990, bayan nan kuma aka naɗa shi Sarkin Zuru.
Marigayin ya yi sarauta cikin tagomashin farin jini a tsakanin al’ummar Masarautar Zuru da kuma manyan yankin, wadda ta kasance masarauta wadda ta tara ɗimbin tsofaffin jami’an soja masu ritaya da sauran tsofaffin manyan ma’aikatan ɓangarorin tsaro daban-daban.
