Babban Bankin Nijeriya (CBN) ta tabbatar da cewa bankunan da a yanzu suka sake ƙarfafa jarin su, yanzu sun fi ƙarfi wajen bada kuɗi ga ƙananan da matsakaitan kamfanoni (SMEs), manyan ayyukan gine-ginen ƙasa da kuma ayyukan masana’antu, bayan kammala shirin sake ƙarfafa jarin su.
A cikin wata takarda wadda aka fitar a ranar Asabar, CBN ya ce shirin ya ƙarfafa tushen jarin masu bada rance, tare da ƙara musu ƙarfin tallafa wa Shirin zuba jari na dogon lokaci da manyan ayyuka masu tsada a fannoni kamar makamashi, masana’antu da fasaha.
A cewar babban jami’i mai kula da harkokin banki, bankunan sun haɗa jimillar Naira tiriliyan 4.65 a matsayin sabon jari, inda bankuna 33 suka cika sabbin ƙa’idojin mafi ƙarancin jari.
CBN ta ce bangaren bankunan da aka sake ƙarfafa jarin na su zai taka muhimmiyar rawa wajen inganta masana’antun ƙasar da kuma faɗaɗa fitar da kayayyaki zuwa ƙasashen waje.
“Ƙarin jari yana bai wa bankuna damar bada kuɗi ga ayyukan gina ƙasa, makamashi, masana’antu da fasaha waɗanda ke buƙatar dogon lokaci da manyan kuɗaɗe,” inji mai kula da harkokin kuɗi na CBN.
“Bangaren da aka sake ƙarfafa jarin sa zai fi iya tallafa wa sabbin manufofin inganta masana’antu da faɗaɗa fitar da kayayyaki zuwa waje.”
Babban bankin ya ƙara da cewa ƙarfafa ma’aunin kuɗaɗen bankuna zai ba su damar ɗaukar manyan nauyin bayar da kuɗi, tare da inganta kwanciyar hankalin tsarin kuɗi gaba ɗaya.
Da yake ƙarin bayani kan amfanin shirin, Gwamnan CBN ya ce ƙarfafan tsarin ajiyar jari zai ba bankuna damar jure girgizar tattalin arziki, su daidaita da ƙa’idojin duniya, tare da inganta kula da haɗari da kyakkyawan tsarin gudanarwa a duk fannin.
“Ta hanyar gina bankuna da suka dace da buƙatun tattalin arzikin da zai kai darajar tiriliyan ɗaya na dala, bangaren zai iya tallafa wa SMEs, kamfanonin da ke fitar da kaya, da kuma manyan ayyukan gine-ginen ƙasa cikin dorewa,” inji CBN.
“Ana sa ran sake ƙarfafa jarin zai ƙarfafa haɗa kowa cikin harkokin kuɗi tare da faɗaɗa damar samun rance a faɗin ƙasa.”
A cewar babban bankin, shirin ya yi daidai da manyan manufofin kuɗi da na kasafin kuɗi, yana tallafa wa sarrafa yawan kuɗi a kasuwa, isar da manufofin gwamnati, da kuma rage hauhawar farashi.
Mai kula da harkokin ya bayyana shirin a matsayin mafi girman gyaran banki tun bayan haɗakar bankunan Nijeriya na shekarar 2005, yana mai cewa wannan babban mataki ne na gina tsarin kuɗi mai ƙarfi, gasa da kuma mai tallafa wa ci gaba.
CBN ya kuma ce bankunan da har yanzu ba su kai sabbin matakan jari ba suna ci gaba da aiki, kuma suna kan hanyar kammala shirin sake ƙarfafa jarin su.
Da yake magana kan wannan nasara, Gwamnan CBN, Olayemi Cardoso, ya ce ba za a iya samun ci gaban tattalin arziki mai ɗorewa ba tare da tsarin kuɗi mai ƙarfi ba.
“Wannan sake ƙarfafa jari yana tabbatar da cewa bankunan Nijeriya za su iya ɗaukar nauyin manyan ma’amaloli da ake buƙata domin bunƙasa tattalin arzikin dala tiriliyan ɗaya,” inji Cardoso.
Gwamnan ya ƙara da cewa shirin ya ƙarfafa juriyar tsarin kuɗi tare da tabbatar da cewa yana cikin shiri mai kyau don tallafa wa ci gaban tattalin arziki da kuma jure matsalolin cikin gida da na waje.
