Gwamnatin Jihar Kano ta dakatar da duk wani nau’in hawan Durbar da hawan dawakai a cikin birnin Kano har sai baba-ta-gani, saboda dalilan tsaro.
Wannan umarni ya biyo bayan wani taron gaggawa na Majalisar Tsaro ta Jihar Kano da aka gudanar a gidan gwamnatin jihar, inda aka yi nazari kan halin da ake ciki na tsaro dangane da shirye-shiryen gudanar da hawan Durbar da hawan dawakai da sarakuna suke shiryawa.
A wata sanarwa da ya fitar yau Lahadi, Darakta-Janar na Yaɗa Labarai da Hulɗa da Jama’a na Gidan Gwamnatin Kano, Sunusi Bature Dawakin Tofa, ya ce an ɗauki matakin ne domin kauce wa yiwuwar samun arangama, tabbatar da zaman lafiya da hana asarar rayuka ko dukiyoyi.
Sanarwar ta ce bayanan da hukumomin tsaro suka samu sun nuna cewa ana samun gagarumin gangamin magoya baya dangane da shirye-shiryen gudanar da waɗannan harkoki, lamarin da ya haifar da fargabar yiwuwar rikici da taɓarɓarewar doka da oda.
Saboda haka, Majalisar Tsaro ta Jihar ta bayar da umarnin dakatar da duk wani shirin hawan Durbar da hawan dawakai a cikin birnin Kano.
Gwamnatin ta ce ta ɗauki wannan mataki ne bisa nauyin da kundin tsarin mulki ya ɗora mata na kare rayuka da dukiyoyin al’umma tare da tabbatar da zaman lafiya da doka da oda a jihar.
Ta ƙara da cewa an umurci dukkan hukumomin tsaro da abin ya shafa da su tabbatar da aiwatar da wannan takunkumi tare da ɗaukar matakin da doka ta tanada kan duk wanda aka samu ya karya umarnin ko ya aikata wani abu da ka iya barazana ga zaman lafiya da tsaron jama’a.
Gwamnatin jihar ta yi kira ga mazauna Kano, masarautun gargajiya, ‘yan siyasa, magoya baya da sauran masu ruwa da tsaki da su kwantar da hankalin su, su kasance masu bin doka da oda tare da mutunta wannan umarni.
Haka kuma, gwamnatin ta tabbatar wa da al’ummar Jihar Kano cewa tana ɗaukar dukkan matakan da suka dace domin kare rayuka da dukiyoyi da kuma tabbatar da zaman lafiya da doka da oda a faɗin jihar.
Umarnin dai ya biyo bayan fitar da wasiƙu biyu daban-daban daga hannun Sarkin Kano Aminu Ado Bayero da Sarkin da gwamnati ta amince da shi, Muhammadu Sanusi II, waɗanda suka bayyana shirin su na gudanar da hawan doki na gargajiya a ranar Lahadi, 27 ga Satumba, 2026.
Wasiƙar Aminu, wadda Sakataren sa na Musamman ya sanya wa hannu, an aika ta ne zuwa ga Hakiman Ƙananan Hukumomi, inda aka sanar da su umarnin tsohon sarkin na su raka shi zuwa bikin Saukar Karatu a Unguwar Yakasai. An tsara cewa zai tashi daga gidan sa da ke Nasarawa da safe domin gudanar da wasu ayyuka, ciki har da zagayawa cikin birnin da kuma ganawa da jama’a.
An ce zai isa gidan sa da ke Mandawari da misalin ƙarfe 11:30 na safe, inda za a gudanar da wasu ayyuka, sannan da misalin ƙarfe 4:00 na yamma zai tashi a kan doki tare da tawagar sa domin halartar bikin Saukar Karatu a Unguwar Yakasai.
Wasiƙar ta bayyana cewa bayan kammala bikin, tsohon sarkin zai sake hawa doki tare da tawagar sa su koma Gidan Nasarawa.
Ita kuwa wasiƙa ta biyu, wadda ta fito daga Sakatariyar Majalisar Masarautar Kano ƙarƙashin jagorancin Sarki Sanusi, an aika ta zuwa ga Hakimai ne dangane da bikin Hawan Babban Ɗaki da aka tsara gudanarwa a ranar ta Lahadi, 27 ga Satumba, 2026.
Wasiƙar ta bayyana cewa ana sa ran wanda aka aike wa da wasiƙar zai halarci bikin Hawan Babban Ɗaki, wanda za a gudanar bisa tsarin shirye-shirye da ƙa’idojin da aka tanada.
An kuma buƙaci wanda aka aike wa wasiƙar da ya kasance a wurin bikin a kan lokaci, tare da shiga cikin ayyukan da aka tanada yadda ya kamata.
A taƙaice, wasiƙun biyu sun bayyana shirye-shiryen ayyukan gargajiya na ranar 27 ga Satumba, 2026, na sarakunan biyu da ke gaba da juna.
Sarakunan biyu sun shafe shekaru suna kai ruwa rana a kotu kan buƙatar kowane ɗayan su ta riƙe da babbar kujerar sarautar Kano.
