Shugaban Hukumar Tarayyar Afrika (AU), Mahmoud Youssouf, ya yi kakkausar suka kan hare-haren ƙunar baƙin wake da suka auku a Maiduguri, Jihar Borno, a ranar 16 ga Maris, 2026, wanda ya yi sanadin mutuwar mutane da dama tare da jikkata wasu.
A cikin wata sanarwa ga manema labarai, ƙungiyar ta bayyana cewa tana “cikin cikakken goyon baya” ga gwamnati da al’ummar Nijeriya a wannan lokaci mai wahala, tare da miƙa ta’aziyya ga iyalan waɗanda suka rasa rayukan su, tare da yi wa waɗanda suka jikkata fatan samun sauƙin warkewa cikin gaggawa.
Ta ƙara da cewa: “Shugaban Hukumar ya sake jaddada ƙin amincewa da kuma Allah-wadai da Tarayyar Afrika ke yi ga duk wani nau’i na tashin hankali da ƙungiyoyin ta’addanci da masu tsattsauran ra’ayi ke aikatawa kan fararen hula da jami’an tsaro. Irin waɗannan ayyuka suna take haƙƙin ɗan’adam kuma suna tauye zaman lafiya, tsaro da kwanciyar hankali a cikin al’umma.
“Shugaban Hukumar ya yaba wa Gwamnatin Tarayyar Nijeriya da kuma hukumomin Jihar Borno bisa ci gaba da ƙoƙarin su na bai-ɗaya wajen yaƙar ta’addanci da inganta tsaro a Maiduguri da kewaye a cikin shekarun baya-bayan nan.
“Wannan mummunan lamari ya sake nuna barazanar da ta’addanci ke ci gaba da haifarwa da kuma buƙatar ƙara yin taka-tsantsan da juriya.”
Shugaban ya kuma yi kira ga ƙasashen duniya da su ƙara ƙaimi wajen tallafa wa Nijeriya da yankin Tafkin Chadi baki ɗaya, ciki har da ƙara agajin jinƙai, gina ƙwarewa, musayar bayanan sirri, da kuma ci gaba da zuba jari a shirye-shiryen tabbatar da zaman lafiya da cigaba domin magance tushen matsalolin tsattsauran ra’ayi.
Ƙungiyar ta sake jaddada cewa sai ta hanyar haɗin kan al’umma gaba ɗaya, tsaro na bai-ɗaya da matakan aiki tare, ƙarfafa haɗin gwiwa, da jajircewa mai ɗorewa ne za a iya murƙushe barazanar ta’addanci yadda ya kamata tare da tabbatar da zaman lafiya mai ɗorewa, bisa tsarin dokoki da manufofin Tarayyar Afrika kan rigakafin rikice-rikice, yaƙar ta’addanci da gina zaman lafiya.
“Shugaban Hukumar ya sake tabbatar da cikakken goyon baya da haɗin kan Tarayyar Afrika ga Gwamnati da al’ummar Nijeriya wajen inganta zaman lafiya mai ɗorewa da kwanciyar hankali,” inji sanarwar.
