Shugaban Ƙasa Bola Ahmed Tinubu, tare da maiɗakin sa, Sanata Oluremi Tinubu, sun isa Birtaniya a yau Talata domin gudanar da gagarumar ziyarar aiki ta kwanaki biyu.
Ziyarar dai ta biyo bayan gayyatar da Sarki Charles III da Sarauniya Camilla suka yi wa shugaban na Nijeriya.
Jirgin shugaban ƙasar ya sauka ne a filin jiragen sama na Stansted da ke Landan da misalin ƙarfe 3:18 na yamma.
Wata sanarwa da ke ɗauke da sa hannun Bayo Onanuga, Mai Magana da Yawun Shugaban Ƙasa kan Harkokin Yaɗa Labarai da Tsare-tsare, ta bayyana cewa Mataimakin Wakilin Masarautar Birtaniya a yankin Essex, Mark Bevan, shi ne ya tarbi shugaban a madadin gidan sarautar.
Sauran waɗanda suka tarbi shugaban sun haɗa da Muƙaddashin Jakaden Najeriya a Birtaniya, Ambasada Mohammed Maidugu, da wasu manyan jami’an gwamnati.
Haka kuma, wasu gwamnoni da sanatoci da ministoci sun hallara a masaukin shugaban domin yi masa barka da zuwa.
Za a karɓi baƙuncin Shugaba Tinubu da matar sa a Fadar Windsor a gobe Laraba zuwa jibi Alhamis.
Babban maƙasudin wannan ziyara dai shi ne ƙarfafa dangantaka tsakanin ƙasashen biyu, tare da lalubo hanyoyin bunƙasa jari ga ‘yan kasuwar Nijeriya da na Birtaniya.
